Rrëshqitje dheu në Mirditë, 8 familje në qiell të hapur

Rrëshqitje dheu në Mirditë, 8 familje në qiell të hapurMIRDITË- 8 familje në komunën Kthellë të Mirditës e kanë kaluar natën jashtë pasi pasi shtëpitë e tyre janë dëmtuar nga rrëshqitjet e dheut, nderkohe qe dy familje te tjera rrezikohen. Gjithcka është shkatërruar, në disa shtëpi muret janë carë, ndërsa të tjera kanë pësuar plasaritje, ndërohë që orenditë kanë mbetur në qiell të hapur.

Banorët thonë se shkak për përkeqësimin e gjendjes janë bërë rrëshqitjet e vazhdueshme në rrugën Rrëshe-Lurë, mbi shtëpitë e tyre. “Ka një javë që ka marrë plasaritje nga mali lart, ndërsa sot e ka shkatërruar komplet shtëpinë. Jam jashtë së bashku me 3 fëmijët”,- shprehet njëri prej banorëve.

“Deri tani nuk është marrë asnjë lloj mase. Këtë shqetësim për shembjen e rrugës e kemi ngritur prej një viti”,- thotë një tjetër banor.

Shqetësimi dhe apeli për ndihmë i banorëve vazhdon të bjerë në vesh të shurdhër, për sa kohë komuna nuk është në gjendje të sigurojë strehë. E vetmja ndihmë për këto familje mbeten cadrat që pritet të jepen nga komuna, për të përballuar ditët që do të vijnë, si dhe lutjet drejt zotit për një përmirësim të motit.
(m.a/News24/BalkanWeb)